Igiciro c’ikawa yumye bita « WASHED » gishizwe ku mafaranga 1600 ku kiro ahabwa umurimyi yose ata kivuyeko, hisunzwe igiciro kw’isoko mpuzamakungu ya New York hamwe n’ubundi buryo bukenerwa mu kuyihingura kugeza ishoke hanze. Ivyo bikamenyeshwa n’umuyobozi mukuru w’ishirahamwe ARFIC mu kiganiro ku ba menyeshamakuru kuri uyu wa kane. Emmanuel NIYUNGEKO yashikirije kandi ko kugura no kugurisha ikawa » WASHED » birekuwe kuva kw’igenekerezo rya 1 gushika kw’igenekerezo rya 30 zukw’icenda uno mwaka.

Ngo imwe  mu zindi ngingo ARFIC yafashe nuko bibujijwe ko ikawa yunguruzwa inyuma yisaha 12 z’umugoroba ngo kandi ku rwego rwa komine umudandaza wese yipfuza  kugura ikawa « WASHED » ategereza gusaba uruhusha mu rwego rwa leta rubijejwe gukurikirana igisata c’ikawa ARFIC hariko ikidodo ca Komine.

Emmanuel NIYUNGEKO yamenyesheje kandi ko ku  rwego rw’intara umudandaza yipfuza kugura ikawa « WASHED » ategerezwa nawe nyene gusaba uruhusha muri ARFIC hariko ikidodo c’intara. Ngo ivyo rero biraba abadandaza banini bagura ikawa WASHED bakongera bakayijana kuyikoboza mu mahinguriro y’amakoborero.

Ngo ikawa « WASHED » yose iguzwe muri komine itegerezwa kurihishwa itagisi y’amafaranga 46 ku kiro imbere yuko ijanwa. Abunguruza ikawa « WASHED » nabo, iva mu Ntara ija mu mahinguriro yabakoborero bategerezwa gusaba urusha mu ntara rwerekana iyo ikawa ijanywe hisunzwe ifiche itangwa na ARFIC.

Emmanuel NIYUNGEKO yarangije amenyesha yuko bibujijwe ko ikawa yunguruzwa inyuma y’isaha 12 zo ku mugoroba. Agasaba abajejwe intwaro, inzego z’umutekano abakora mu gisata c’ikawa hamwe n’abenegihugu bose gufashanya kugira ngo izo ngingo zubahirizwe.