Mw’ikete ryarungikiwe aba comissaires bakuru  bose, abarongoye ibiro vy’igipolisi hamwe naba commissaire batwara uburere, umugenduzi w’igipolisi abuza abo ba polisi kandi ko boja mu karuhuko bitwaje ivyo bikoresho vy’akazi.

Muri urwo rwandiko ubutumwa burimwo bwitiriwe ″Ingingo ngenderwako zijanye n’umutekano″, ubugenduzi bukuru bw’igipolisi bwafashe ingingo zitandukanye. Muri izo ngingo harimwo ko ama grenade yose ategerezwa kubikwa mu bubiko bw’ibirwanisho.

Urwo rwandiko kandi ruvugako ibirwanisho bizofatwa mu bikorwa vyo gusaka bizoza bishikanwa mu gisata kijejwe ububiko bwavyo.

Ngo aba polisi bazoja mu bunywero bafise ibirwanisho canke bambaye impuzu z’akazi ngo bazohanwa vy’akarorero.

Urwo rwandiko nyene ruvuga ko kizira kikaziririzwa kwihanira ku bantu bagirizwa uburozi nayo inyamiramabi zigasabwa gukora amatohoza yimbitse aho gufatira kuvyo bene abo bantu baba biyemereye.

Urwo rwandiko kandi rubuza abapolisi gufata amasanamu no kuyarungika ku mbuga ngurukanabumenyi iyo bari mubikorwa bimwe bimwe. Ngo uwuzobikora akazofatirwa ibihano vyakazi bita ″ mesures disciplinaires″. Urwo rwandiko ruheraheza rusaba aba comissaires batwara uburere gufata ingingo zihuta iyo habaye ibikorwa bihohotera agateka kazina muntu mu burere batwara.