Mu gihe komiseri mukuru w’ikigo gitoza amakori ya leta OBR Audace NIYONZIMA yariko arugurura ico kibanza, yamanje kumenyesha imvo zari zatumye cugagwa. Aho naho hari muri munyonyo umwaka w’2017. Ngo ico kibanza cari cugawe kubera cari cagurishijwe hatarishwe amakori nkuko bitegekanijwe n’amategeko.

Nkuko komisere  mukuru w’ikigo OBR abandanya abimenyesha, ngo mu biharuro bakoze  basanze amakori yategerezwa kurihwa  angana n’imiliyoni 344, hagaca hiyongerakao amahadabu, yose hamwe agaca angana  imiliyoni 894.

Audace NIYONZIMA yaciye amenyesha yuko bashima ingene ayo mafaranga yose yarishwe. Ngo bakaba baje kwugurura ico kigo ku mugaragaro kugira ngo ntihagire uwogira amakenga kuvyerekeye irihwa ryayo mafaranga.

Audace NIYONZIMA akaba yaboneyeho akaryo ko kugabisha abagura n’abagurisha ibibanza bitandukanye gukurikiza amategeko mu bijanye n’irihwa ry’amakori. Akaba yasavye n’abandi bashobora kumenya inkuru nk’izo zerekana ahaba hakorewe ibikorwa  bitarishe amakori neza bakabimenyesha kuko agashirukabute k’icumi kw’ijana gategekanijwe.

Mu kurangiza, Audace NIYONZIMA akaba yamenyesheje yuko ubu bafise ubuhinga bakoresha n’uburyo bwo gukora  amatohoza  kugira bashobore gutora abantu nk’abo baba bagurishije ibintu ntibashobore kuriha amakori yose.